Բժշկական նոր կենտրոն Ապարանում

Հայաստանի Հանրապետության առողջապահության նախարարությունը հավատարիմ մնալով մարզային բուժհաստատությունները վերանորոգելու և ժամանակակից նորագույն սարքավորումներով հագեցնելու իր կողմից որդեգրած քաղաքականությանը, ՀՀ Կառավարության և Համաշխարհային բանկի «Առողջապահական համակարգի արդիականացում» վարկային ծրագրի շրջանակներում հիմնանորոգել է Արագածոտնի մարզի Ապարանի բժշկական կենտրոնը: 

Կենտրոնի բացման արարողությանը մասնակցել են ՀՀ նախագահ Ս. Սարգսյանը, ՀՀ առողջապահության նախարար Հ. Քուշկյանը, Արագածոտնի մարզպետ Ս. Սահակյանը, առողջապահության վարչության պետ Ա. Բասենցյանը, բուժաշխատողներ, հյուրեր: 

Բարձրաստիճան ղեկավարներն ու հյուրերը ծանոթացել են կենտրոնի պոլիկլինիկայի, շտապ բուժօգնության կայանի, վիրաբուժական, հետվիրահատական ինտենսիվ բուժման և այլ բաժանմունքների պայմաններին, գնահատական տվել մատուցվող ծառայությունների որակին:

Լրագրողների հետ զրույցում ՀՀ առողջապահության նախարար Հ. Քուշկյանը նշել է, որ ՀՀ մարզերի համաչափ զարգացման ծրագրի շրջանակներում նախորդ տարի Հայաստանի մարզերում բացվել է 5 խոշոր բժշկական կենտրոն` Հրազդանում, Իջևանում, Արմավիրում, Արարատում, Գորիսում: 

Ապարանի բժշկական կենտրոնում կատարված ներդրումների արդյունքում վերանորոգվել է երկհարկանի հիմնական մասնաշենքը, ամբողջությամբ հիմնանորոգվել է պոլիկլինիկական և հիվանդանոցային մասերից բաղկացած մասնաշենքն ու կաթսայատունը: Հիվանդանոցը կահավորվել և հագեցվել է արդի բժշկական սարքավորումներով:

Բժշկական կենտրոնում ներկայումս աշխատում է 38 բժիշկ, 76 միջին բուժաշխատող:

- Այսօր մենք ունենք հիմնովին վերանորոգված, անհրաժեշտ սարքավորումներով հագեցած հիվանդանոց, ինչը հնարավորություն կտա բնակիչներին բարձր մակարդակով բուժօգնություն տրամադրելու,- նշել է նախարարը:

Հարցեր, պատասխաններ, մեկնաբանություններ